GOIZUETAKO INAUTERIAK
Inauteriak hausterre-egunaren aurreko hiru egunetan ospatzen dira. Ospakizunetako lehendabiziko egunean, Mozorrok deitutako gazte taldeek baserrietatik erronda egiten dute, eta etxe bakoitzean jana eta edaria eskainiz harrera egiten diete familiek. Dirua ere biltzen dute inauterietako gastuei aurre egiteko (Mozorroen taldeak antolatzen ditu egun horiek). Hurrengo eguneko arratsaldean, gazte horiek Zaia pertsonaia nagusiari (bat edo bi izan litezke) laguntzen diote musikak alaituta. Zaiak ikazkin baten papera egiten du, urdinez jantzia eta aurpegia beltzez margotua eta begi ingurua gorriz. Zahagi bat (Goizuetan zaia) darama bizkarrean eta joarea zintzilik.
Mozorroek, txuriz jantziak, txapel gorri, zapi eta gerriko gorria eta parte hartzaileen erdiak gona txuriarekin, Zaiari laguntzen diote. Noizean behin taldea elkartu egiten da eta Zahagi-Dantza dantzatzen dute, trikitixarekin lagundurik. Dantza bukatzen denean, ikazkina korrika ateratzen da emakumeen atzetik, eta aurpegiarekin igurtziz emakumeak belztu egiten ditu.
Ospakizun honen jatorria zehaztu gabe dagoen garai batekoa den arren, bertakoek egiazko istorio gisa kontatzen dute: urte osoan mendian eta bere ogibideari emana bizi zen ikazkin baten istorioa. Inauteriak iristean herrira jeisten zen, inguruko beste ikazkin guztiak bezala. Mozkortzen zenean, parean topatzen zituen emakume guztiak musukatzen zituen. Hortaz, hori egiteagatik herriko gazteek beren herrikidea barregarri utzi nahi izan zuten, eta era horretan sortu zen ohitura hau. Dantzaren bukaeran Mozorroek beren makilekin ikazkinak bizkar gainean daraman zahagia golpatzen dute, istorioak dioen bezala, herriko gazte jeloskorrek ikazkina astintzen bukatu baitzuten.
BESTE OSPAKIZUN ETA FESTAK
- Amabirjin jaien aurreko igandean umeen eguna ospatzen da.
- Goizuetako Amabirjin festak abuztuaren 15ean izaten dira. Festa egunak abuztuaren 14tik 18ra.
- Txino auzoko jaiak. Maitzaren lehenengo asteburuan.
- Feria. Goizuetan Feria urriko, azaroko, abenduko eta urtarrileko azkeneko astebukaeran ospatzen zen orain dela 20 urterarte. Herriko produktuen komertzio-gune garrantzitsua suposatzen zuen eta zonaldeko bizilagunen zita ere bazen. Zorionez, gaur egun eta 2004. urtetik, feria berreskuratzeko ekimena sortu zen, azaroko azken larunbatean ospatzen delarik.
- San joan bezperan , afari herrikoia izaten da eta sua piztutzen da.